कुसुमाग्रज - थेंब

महासागराचं चरित्र
मला माहीत आहे
माहीत आहे त्याची महतीही,
पण मी राहतो आहे
फुलाच्या पाकळीवर
अवकाशातून उतरलेल्या
दहिवराच्या
एका लहानशा थेंबामध्ये;
मला माहीत आहे हेही
की जगातील सार्‍या थेंबांवर
अंतिम मालकी आहे
महासागराची,
आणि तरीही माझी बांधीलकी
पृथ्वीला वेढणार्‍या
त्या सीमाहीन महातत्त्वाशी नाही,
ती आहे --
माझ्याच अस्तित्वाने ओथंबलेल्या
स्फटिकाच्या या थेंबाशी;
कारण -- माझी बांधीलकी
ज्ञानाची नाही
आहे फक्त प्रेमाची.