वा.रा.कान्त - दु:खालाच कारण होतात

दु:खालाच कारण होतात त्याच्या

सांबराची शिंगे,

तसेच माणसांचे संबंधही.

मीही एक शिंग त्यांच्यातले

तुझ्यासाठी. पण

तू तरी सांबर आहेस, की---

की तूही एक शिंगच?

शिंगांना नसते समज;

सांबरालाही हे कळत नाही

फांद्यात शिंगे घुसेपर्यंत;

शिंगांचाही नाईलाज असतो:

त्यांना दिसत नाहीत झाडे, फांद्या;

सांबरालाही स्वत:चाच वेग असहाय बनवतो;

वर तळ्यातल्या प्रतिबिंबाने केलेला असतो

त्याचा ’नार्सीसिस.’

प्रतिबिंब तळ्यात राहते;

सांबर झाडात अडकते;

तडकतात आरसेही तळ्यांचे उन्हाळ्यात.

ते असो.

तू सांबरशिंगाचा लेप लाव

आपल्या जखमेवर;

पहा, वेदना कमी झाल्या तर!