हेमंत गोविंद जोगळेकर - त्याची इच्छा

दिवसभराचे काम करुन थकल्यावरती
तुम्ही शिरू शकता तुमच्या नवर्‍याच्या कुशीत
त्याची इच्छा असेल तर,
त्याला झोप येऊन तो तुमच्याकडे पाठ करून झोपेपर्यंत.
पण त्याची इच्छा असेल
तर तुम्ही करू नका कंटाळा
कारण त्याची इच्छा असते तुम्हांला थोपटून तुमचा शीण घालवण्याची.

रात्री मध्येच तुमची छोटी उठल्यावरती
तुम्ही उठा तुमची स्वप्ने थांबवून
आणि कपडे चढवून, थोपटा तिला ती झोपेपर्यंत.
पण ती तशीच रडत राहिली
तर तिला बाहेर घेऊन जा खेळवायला;
नाहीतर तुमच्या नवर्‍याची झोपमोड होईल
कारण त्याला जायचे असते दुसर्‍या दिवशी कामावरती.

तुमच्या मोठ्याची आन्हिके, शाळा, अभ्यास
खाणेपिणे, भांडणे सोडविणे झाल्यावरती
वेळ काढून तयार करून द्या त्याला भाषण : ’माझी आई’
कारण त्याची इच्छा असते व्यासपीठावरून तुमचा गौरव करण्याची.

पाहुण्यांचे खाणे, फिरणे केल्यावरती
थोडावेळ आवर्जून बसा हसून खेळून त्यांच्याशी
कारण त्यांची इच्छा असते तुमच्याशी बोलण्याची,
तुमचे कौतुक करण्याची.
रेशन, बाजारहाट, बॅंक, सौजन्यभेटी
नवर्‍याच्या पॅंटचे तुटलेले बटण शिवणे,
त्याच्याबरोबर नटूनथटून अनोळखी पार्टीला जाणे
आणि हे सगळे करून तुम्ही मुद्दाम काढा वेळ
तुमची सतार, भरतकाम किंवा लिखाणासाठी
कारण तुमच्या नवर्‍याची इच्छा असते
तुमचे व्यक्तिमत्त्व विकसित करण्याची!

हेमंत गोविंद जोगळेकर :: पहा कवितेकडे..., कवितेसाठी

पहा कवितेकडे...,  कवितेसाठी

पहा कवितेकडे
डोळॆ भरून
आपादमस्तक
एकसंध
मग पहा तिची एकेक ऒळ
एकेक शब्द
दोन शब्दांमधला
जीवघेणा अवकाश.

ऐका कवितेला
कान लावून
ऐकूही येईल
धडधड
जशी यावी दूरवरून
येणार्‍या किंवा जाणार्‍या गाडीची
विजनात पसरलेल्या समांतर रुळांमधून.

सूर मारून
पोहत जा ओळीओळीतून
किंवा ओळ मोडून
वाटलंच तर हात करा
(किंवा करूही नका)
वरच्या काठावर उभ्या शीर्षकास
किंवा खालच्या काठावर उभ्या
कवीच्या नावास.

आपसूकच करील स्पर्श
पृष्ठभागाखाली बुडलेल्या तुमच्या रंध्रारंध्रास
कवितेचे पाणी
घ्या उचलून
तुमच्या जिभेच्या शेंड्यावर
एखादा शब्द
जसा हळूच टिपावा
बाळजिभेने
साखरेचा कण.

पहा हुंगून
कवितेची टाळू
येईलही तुमच्या छातीत भरून,
जन्मजन्माइतका जुना
शेकशेगडीचा धूर.

आणि वाटलेच अगदी आतून
तर घ्या उचलून
कवितेला
तुमच्या हृदयाशी
फुटेलही कदाचित तुमच्या आतून
अर्थाचा अनावर पान्हा
कवितेसाठी




हेमंत गोविंद जोगळेकर