एकमेक - कविता महाजन

थोडावेळ बसू एकमेकांसोबत शांत

एकमेकांविषयी काही न बोलता.

मी सांगणार नाही की आजकाल

वाटतंय मरून जाईन रात्री झोपेतच.

स्वप्न पाहता-पाहता मरून गेलेलं माणूस

मेल्यावर कुठं जातं, हेही विचारणार नाही तुला.

तूही सांगणार नाहीस की

बाकी सारं कंटीन्यू होईलच पुढच्या जन्मात

जसं गेल्या जन्मीचं झालं या जन्मी

आणि प्रत्येक जन्मात आपल्याला

समजतेय एकमेकांची भाषा.

अजून काय हवंय आता

एका लहानशा निळ्या पूर्णविरामाखेरीज?

कविता महाजन -- कोण ऐकतं हाक?

कोण ऐकतं हाक?
एक चांदणी जेव्हा हाक मारते
घुसमटल्या आवाजात जीवाच्या आकांताने
तेव्हा ना काळोख ऐकतो
ना उजेड

पाहत राहतात जागणारे सारे
न ऐकता
त्यांनी ऐकलंय पिढ्यानुपिढ्या
की कोसळणार्‍या चांदणीकडे पाहून
डोळे मिटायचे आणि तिला
आपली इच्छा सांगायची...
कोसळणारी चांदणी
इच्छापूर्ती करणारी असते.

चांदणी दगड होते कोसळताना
सारं तेज लोप पावतं तिचं
जिथे कोसळते तिथे एक
विवर जन्मतं पृथ्वीवर.
विवरातल्या पाण्यात दिसत राहतात
अगणित चांदण्यांची प्रतिबिंबं.

कोण ऐकतं हाक ! ?