कविता महाजन -- कोण ऐकतं हाक?

कोण ऐकतं हाक?
एक चांदणी जेव्हा हाक मारते
घुसमटल्या आवाजात जीवाच्या आकांताने
तेव्हा ना काळोख ऐकतो
ना उजेड

पाहत राहतात जागणारे सारे
न ऐकता
त्यांनी ऐकलंय पिढ्यानुपिढ्या
की कोसळणार्‍या चांदणीकडे पाहून
डोळे मिटायचे आणि तिला
आपली इच्छा सांगायची...
कोसळणारी चांदणी
इच्छापूर्ती करणारी असते.

चांदणी दगड होते कोसळताना
सारं तेज लोप पावतं तिचं
जिथे कोसळते तिथे एक
विवर जन्मतं पृथ्वीवर.
विवरातल्या पाण्यात दिसत राहतात
अगणित चांदण्यांची प्रतिबिंबं.

कोण ऐकतं हाक ! ?