बा. भ. बोरकर - सरिवर सरी आल्या ग

सरिवर सरी आल्या ग

सचैल गोपी न्हाल्या ग

गोपी झाल्या भिजून चिंब

थरथर कांपति निंब-कदंब

घनांमनांतुन टाळ-मृदंग

तनूंत वाजवि चाळ अनंग

पाने पिटती टाळ्या ग

सरिवर सरी आल्या ग

मल्हाराची जळांत धून

वीज नाचते अधुनमधून

वनात गेला मोर भिजून

गोपी खिळल्या पदीं थिजून

घुमतो पांवा सांग कुठून?

कृष्ण कसा उमटे न अजून?

वेली ऋतुमति झाल्या ग

सरिवर सरी आल्या ग

हंबर अंबर वारा ग

गोपि दुधाच्या धारा ग

दुधांत गोकुळ जाय बुडून

अजून आहे कृष्ण दडून

मी-तूं-पण सारें विसरून

आपणही जाऊं मिसळून

सरिवर सरी आल्या ग

दुधांत न्हाणुनि धाल्या ग

सरिवर सरी : सरिवर सरी....

बा. भ. बोरकर - हवा पावसाळी

हवा पावसाळी जरा रात्र काळी

ढगाआडचा चंद्र थोडा फिका

दिवे दूर काही धुक्याच्या प्रवाही

जळी पूल कोणी लुळा मोडका

कुठे दाट खोपी उभे माड झोपी

पथी झावळांच्या खुळ्या सावळ्या

कुठे सर्द वारा जरा गर्द खारा

जीवा स्पर्शुनी त्याही भांबावल्या

कुणी बांग देतो कुणी वेध घेतो

अकस्मात तेजाळती काजवे

सुखाच्या तळाशी किती दु:खराशी

उरी कारणाविणही कालवे

नदी आज जागी उदासी अभागी

अजुनी न ये नीज या सागरा

हवा पावसाळी जरा रात्र काळी

हिची आगळी आज काही तर्‍हा