वेडा

स्वप्न विकायला काढलेला एक वेडा
परवा फिरत होता आपल्याच शहरातल्या गल्ल्यांमधून..
ओरडत होता, "हे सगळं फुकट आहे;
फक्त तुमचे डोळे मला एकदा तपासू द्या.
ही स्वप्न पहायची ताकद त्यांच्यामध्ये आहे, एवढं मला कळलं की बस!
मग हे सारं तुमचं!"

लोक हसले त्याला, खूप हसले!
त्याच्या डोळ्यातलं वेड उतरलंच नाही पण
शेवटपर्यंत..
काल रात्री समुद्राच्या काठाशी पाहिलं
त्याला कोणी कोणी, अखेरचं..
लाटांमध्ये जाताना किना-यावर भिरकावून दिली एक होडी त्याने,
म्हणाला, "माझ्या मागे येईलच एखादा वेडा.
स्वप्नांमध्ये बुडता बुडता
कोणाच्याच हाती किनारा लागला नाही,
असं नको व्हायला..!!"

होडी काठावर अजून हिंदकळतेच आहे..

- स्पृहा जोशी